Is-Sur Ronald Mizzi ngħaqad mas-Servizz Pubbliku fl-2004 bħala Economics Officer fi ħdan id-Dipartiment għall-Iżvilupp Rurali, sabiex fl-2006, kien assenjat bħala Uffiċjal tar-Riċerka ġewwa l-Forum Malta fl-Ewropa fejn dam sa l-2008.

Huwa ħadem bħala Manager tal-Proġetti u aktar tard bħala Senior Manager ġewwa l-Awtorità ta’ Ġestjoni ta’ Malta għall-Fondi ta’ l-UE taħt l-Uffiċju tal-Prim Ministru. Hawnhekk huwa kien responsabbli mit-tmexxija u l-eżekuzzjoni b’suċċess ta’ numru ta’ proġetti kbar ko-finanzjati mill-Unjoni Ewropea taħt il-programmi ta’ fondi 2004-2006 u 2007-2013. Huwa kien responsabbli wkoll mill-għeluq b’suċċess tal-ewwel programm ta’ fondi.

Huwa dam iservi fl-Awtorità ta’ Ġestjoni sal-2013, meta ntgħażel biex iservi bħala Direttur għall-Affarijiet ta’ l-Unjoni Ewropea u t-Twettieq tal-Programm mal-Ministeru għall-Enerġija u l-Konservazzjoni ta’ l-Ilma.

Is-Sur Mizzi nħatar Segretarju Permanenti tal-Ministeru għall-Enerġija u s-Saħħa (Enerġija) f’April tal-2014 u aktar tard serva bħala Segretarju Permanenti fl-Uffiċju tal-Prim Ministru b’portafoll li inkluda l-enerġija, l-ilma u Poġetti bejn il-Gvern u l-Privat. Huwa kien strumentali biex tmexxew ‘il quddiem numru kbar ta’ riformi fil-qasam tal-enerġija u biex ingħalqu b’suċċess id-diskussjonijiet mal-Kummissjoni Ewropea dwar State Aid b’relazzjoni mal-proġett il-ġdid tal-Enerġija u l-Gass f’Delimara.

Fl-2017, is-Sur Mizzi inħatar Segretarju Permanenti tal-Ministeru tat-Turiżmu b’portafoll li jinkludi l-avjazzjoni u l-Air Malta, it-turiżmu u l-istudji relatati miegħu, it-trasport estern, l-industrija tal-films u proġetti bejn Gvern u Privat.  F’Jannar 2020, il-Ministeru sar ukoll responsabbli mill-Ħarsien tal-Konsumatur. Is-Sur Mizzi mexxa s-settur tat-turiżmu matul l-aktar xhur iebsa li ġabet magħha l-pandemija tal-COVID-19, li waqqfet lis-settur ħesrem.

F’April 2022 is-Sur Mizzi nħatar Segretarju Permanenti fil-Ministeru għall-Ekonomija, Fondi Ewropej u Artijiet b’portafoll li jiffoka primarjament fuq l-ekonomija diġitali.

Is-Sur Mizzi għandu Masters Degree fl-Istudji Ewropej u l-ewwel degree fir-Relazzjonijiet Internazzjonali, it-tnejn mill-Università ta’ Malta filwaqt li maż-żmien tħarreġ f’diversi oqsma differenti minn istituzzjonijiet ta’ fama internazzjonali fejn kiseb firxa vasta ta’ ħiliet.

Is-Sur Mizzi iservi wkoll fuq diversi kumitati fuq livell Ewropew. Fl-2023 inħatar ukoll bħala Ċerpersin tal-MIMCOL u MGI.